Зейнетақы есебінен көрсетілетін медициналық қызметтерді көбейту керек - депутаттар

Зейнетақы жинағының есебінен көрсетілетін медициналық қызмет түрлері жеткіліксіз. Депутаттар бекіген тізімді сынға алып, кеңейтуді сұрады. Өйткені, кейбір қымбат ем-дом құжатқа мүлде енбей қалған. Мәселен, экстракорпоральді ұрықтандыру. Бұл мемлекет тарапынан тегін көрсетілетін қызмет түріне жатады. Ал, миллиондаған қазақстандықтың міндетті әлеуметтік медициналық сақтандыруы жоқ. Осыны сала министрлігі ескермеген. Бұдан тыс, зейнетақы жинағын ауыр сырқаттан кейінгі оңалтуға, қалыпқа келуге, сондай-ақ косметологиялық операцияларға жұмсауға рұқсат берілуі керек деп отыр.

Аманжан Жамалов, ҚР Парламенті Мәжілісінің депутаты:
Әсіресе бедеулік мәселесіне тоқталғым келеді. Елдегі әрбір алтыншы отбасы балалы бола алмайды. Мемлекет басшысының тапсырмасымен, биылдан бастап экстракорпоральді ұрықтандыруға квоталар саны 7000-ға дейін ұлғайды. Бұл мемлекет тарапынан үлкен қолдау. Бірақ бұл да жеткіліксіз. Кезекте 10 мыңнан аса адам тұр. Яғни, 3000 отбасы осы мемлекеттік квотаны ала алмайды.

Нысаналы Ығыл