42 мың теңге: Қазақстан қай мамандыққа ең жоғары стипендия тағайындап отыр

Педагогикалық мамандықтарда оқитын студенттер 42 мың теңге мөлшерінде шәкіртақы ала бастады. Бұл - барлық мамандықтардың ішіндегі ең жоғары стипендия. Білім және ғылым министрі Асхат Аймағамбетов Facebook-тегі парақшасында осылай деп жазды.

Оның айтуынша, биыл маусым айынан бастап педагогикалық мамандықтарға түсу үшін шекті балл бірден 70-ке дейін көтерілді. 

«Педагог мәртебесі туралы» заңды қабылдаудың және атқарылыған шаралардың арқасында биыл «Алтын белгі» төсбелгісі иегерлерінің арасында педагогикалық мамандықты таңдағандар саны 1,7 есе өсті, ал көптеген бағыт бойынша орташа балл 100-ден асты. Егер бірнеше жыл бұрын педагогикалық мамандыққа түсушілердің орташа балы 65-ті құраса және педагог мамандығы түлектер арасында көп сұранысқа ие болмаса, қазір жоғары балл жинаған мықты түлектер педагогикалық бағыттар бойынша оқуға түсе бастады», - деді министр.

Сонымен қатар Асхат Аймағамбетов Президенттің мамыр айындағы Ұлттық қоғамдық сенім кеңесінің қорытындысы бойынша берілген тапсырмалар аясында докторанттардың стипендиясы 102 мыңнан 150 мың теңгеге дейін өскенін мәлімдеді. 

«Мұндай шара жас ғалымдарды қолдау үшін өте маңызды, өйткені докторанттардың отбасылары бар және олар өз зерттеулерін жүргізумен айналысады», - деді ол.