Жаңалықтарды Telegram арнамыздан оқыңыз!Саяси дода мұхиттың ар жағында да қызып тұр. Мәселен, АҚШ-тағы президенттік сайлауға 45 күн қалды. Әдетте, праймеризден іріктелген республикалық және демократиялық партияның басты үміткерлері бір-бірімен сынасады. Ал, Дональд Трамптың бұл жолғы қарсыласы Джо Байден.
Әлия Әшім, тілші:
- АҚШ-тағы президент сайлауына 1,5 ай қалды. Сондықтан үгіт-насихат науқаны қызу өтіп жатыр. Қай кандидаттың мүмкіндігі басым екені белгісіз. Алайда, соңғы жалпыхалықтық сауалнамада демократ Байден көш бастады. Трампты америкалықтардың 43 проценті ғана қолдап отыр.
Әрине, 3-ші қараша сайлау күні бәрі басқаша болуы мүмкін. Себебі, 4 жыл бұрын сауалнамаларда озық болған Хиллари Клинтон сайлаудың өзінде ұтылып қалғанын білеміз. Дегенмен, Covid пен қара нәсілділер көтерілісінен кейін Трамптың халық арасындағы рейтингісі әжептәуір түсіп қалғаны анық.
Алайда, Трамп үгіт-насихатын бәсеңдеткен жоқ. Өткен апта пандемияға қарамастан президент Трамп мыңдаған адамды Невадада жинады. Бірақ мамандар президенттің бұл қадамын қате деп отыр.
Тоби Берковиц, саясаткер, Бостон университетінің профессоры:
-Трамп қазір ұтылып жатыр. Себебі оның саяси кампаниясы Байденге қарсы шабуыл төңірегінде қалып қойды.
Ал демократ Байден әзірге 5-6 адаммен ғана бас қосып, арақашықтық сақтап, жұртпен БАҚ арқылы байланысып жүр.
Әлия Әшім, тілші:
- Екі түрлі саяси кампания, екі түрлі кандидат. Америкалықтардың кімге бүйрегі бұрады, қарашада көреміз.
Әлия Әшім
