Ақтауда 14 жастағы қыздың ішегінен шаш пен ине табылды

Маңғыстау облысында дәрігерлер 14 жастағы қыздың ішегінен шаш пен ине алып шықты. Бұл туралы Facebook қолданушысы Азамат Сәрсенбаев өз парақшасында жазған: «15 қаңтарда кешке дәрігер Насуқан Отарғазиев Маңғыстау облыстық Балалар ауруханасында шұғыл түрде күрделі ота жасап, 14 жастағы қыздың өмірін құтқарып қалды. Науқас балалар ауруханасына іші ауырып, ауыр халде түскен. Құрсақ қуысы ағзаларының рентгенін түсіргеннен кейін дәрігер денеден бөгде заттар тапқан. Операциядан кейін асқынулар болған жоқ. Дәрігердің айтуынша, баланың жағдайы – қанағаттанарлық».