Жаңалықтарды Telegram арнамыздан оқыңыз!Алматы облысында 2-сынып оқушысы мектепте қайтыс болды. Қайғылы жағдай Текелі қаласындағы №4 мектепте болған.
«2-сынып оқушысы бірінші сабақ біткеннен кейін үзілісте асығыс шығып, баспалдақпен асхана жаққа беттеген. Жағдайдың қалай болғанын ешкім көрмеген. Мұғалімдер шыққан кезде бала құлап жатқан»,- дейді Текелі қаласындағы №4 орта мектеп директорының тәрбие ісі жөніндегі орынбасары Әйгерім Бексұлтанова.
Директор орынбасарының сөзінше, бала 15 минуттың ішінде қайтыс болған. Денесінде ешқандай жарақат белгілері жоқ. 8 жастағы оқушы нақты баспалдақтан құлады ма, әлде қазасына басқа да себеп болды ма, ол жағы белгісіз. Себебі білім ордасының басшылығы бала кәмпитке шашалып қалуы мүмкін дегенді де айтып отыр. Өйткені оқушыға алғашқы медициналық көмек көрсеткенде оның аузынан шоколадтың қалдықтары шыққан.
Алматы облыстық Полиция департаменті баспасөз қызметінің мәліметінше, мектепте көз жұмған оқушыға қатысты қылмыстық іс қозғалмаған. Аталған факті оқыс оқиға ретінде тіркелген.
inform.kz
