Жаңалықтарды Telegram арнамыздан оқыңыз!Астанада жыл соңына дейін 73 ІТ-сынып ашылады. Қазірдің өзінде осындай 11 оқу бөлмесі жұмыс істеп тұр. Сондай-ақ, ересектерге арналған 20 ІТ-орталық ашу жоспарда бар. Бүгін «Нұр Отан» партиясы Төрағасының бірінші орынбасары Мәулен Әшімбаев заманауи орталықтың жұмысымен танысты. Бұл жерлерде компьютерлік бағдарламалау, робототехника, 3D модельдеудің қыр-сырын тегін оқып, үйренуге болады.
Бұл заманауи оқу сыныптары «Нұр Отан» партиясының «Тегін 1000 ІТ-сынып» жобасы аясында ашылған. Қазірдің өзінде 225 бала осы жерде білімін толықтыруда. «Осындай орталықтар арқылы біз жастардың және жалпы халықтың ІТ сауаттылығын көтереміз», - дейді партия Төрағасының бірінші орынбасары.
Мәулен Әшімбаев, «Нұр Отан» партиясы Төрағасының бірінші орынбасары:
- Қазақстан бойынша 100-ден астам ІТ-сыныпты аштық. Олар енді жұмысын 1-қыркүйектен бастап жандандыра түседі. Осы жылдың аяғына дейін 250 ІТ-сыныпты ашуды жоспарлап отырмыз. Жалпы, алдымыздағы 2-3 жылдың ішінде 1000 ІТ-сыныпты ашатын боламыз.
Оқушылар мен студенттердің тарапынан заманауи жабдықталған сыныптарға деген сұраныс жоғары. «Әсіресе, болашағын осы саламен байланыстырғандарға таптырмас мүмкіндік», - дейді мамандар.
Сондай-ақ, Мәулен Әшімбаев №5 кітапханада ашылған «Коворкинг орталығына» да ат басын бұрып, партия бастамасымен қолға алынған жұмыстардың барысымен танысты. Заманауи үлгіде жабдықталған нысан кез келген жастағы оқырманға сапалы қызмет көрсете алады.
Оңғар АЛПЫСБАЙҰЛЫ
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
