Жаңалықтарды Telegram арнамыздан оқыңыз!Конституцияның 30 жылдығына орай Алматыда еліміздегі алғашқы Цифрлық медицина орталығы ашылды. Мақсат – денсаулық сақтау жүйесінің ашықтығы мен тиімділігін арттыру. Мәселен орталықта телемедициналық патронаж жұмыс істейді. Яғни енді дәрігерлер науқастың жай-күйін қашықтан бақылай алады. Маман пациентке қоңырау шалып онлайн-кеңес береді. Цифрлық медицина орталығында жетекші мамандар бар. Сондай-ақ телемедициналық консилиум ұйымдастыру мүмкіндігі де енгізілген. Заманауи тәсіл ұзын сонар кезекті азайтып, маусымдық аурудың таралу қаупін төмендетеді,-дейді мамандар. Бұдан бөлек, дәрігер қабылдауына тез жазылу үшін тәулік бойы бірыңғай байланыс орталығы жұмыс істеп тұр. Дәрігерлердің айтуынша, бұл емханадағы тіркеу бөлімдерінің жүктемесін шамамен 20%-ға азайтады.
Венера Тохтахунова, Цифрлық медицина орталығының жетекшісі:
Жасанды интеллектке негізделген дауыстық көмекші науқастарды скринингке, вакциналауға, флюорографияға автоматты түрде шақырады. Келесі жылы қаланың барлық медициналық мекемесін бірыңғай байланыс орталығына көшіріп, еңбекке жарамсыздық парағын телефон арқылы онлайн беру секілді жаңа бағыттарды іске қосу жоспарда бар.
Раушан Сайлауқызы
