Азиядағы өзара іс-қимыл және сенім шаралары кеңесі қаржы саммитін өткізеді. Бұл шара Бейжіңнің бастамасымен жүзеге асырылып, қаржылық ынтымақтастық мәселелерін талқылайтын тұрақты сарапшылар алаңына айналады деп жоспарлануда. Қазақстан тарапынан Астана халықаралық қаржы орталығы, Президент жанындағы стратегиялық зерттеулер институты және Әлемдік экономика мен саясат институтының мамандары қатысады. Бұл туралы Біріккен Ұлттар Ұйымы шеңберіндегі Азиядағы өзара іс-қимыл және сенім шаралары кеңесінің бейресми жиналысында хабарланды.
Қайрат Сарыбай, Азиядағы өзара іс-қимыл және сенім шаралары кеңесінің Бас хатшысы:
«Кеңес мүшелерінің еңбегі нәтижесінде ынтымақтастықтың жаңа бағыттары қарқынды дамып келеді. Ұйымның трансформациясына арналған жол картасы бойынша қажетті жұмыстар жүргізіліп, Қазақстанның ратификациялауымен хатшылық халықаралық мәртебеге ие болды. Сонымен қатар, Қасым-Жомарт Тоқаевтың шешімімен ұйым қызметкерлері жаңа штаб-пәтерге көшті. Бұл жаңалықтарды өз көздеріңізбен көру үшін баршаңызды Астанаға шақырамын».
