Басты Жаңалықтар Астанада Азия даму банкінің 47-ші отырысы өтуде

Астанада Азия даму банкінің 47-ші отырысы өтуде

02.05.2014 07:30

Бүгін Астанада Азия даму банкінің 47-ші отырысы өтуде. Өткен жылы Үндістан астанасы Нью-Дели қаласында 2014 жылы Азия даму банкі басқарушылар кеңесіне төрағалық етуші ел мәртебесіне Қазақстан ие болған еді.

ҚР Экономика және бюджеттік жоспарлау министрлігі, Азия даму банкі және «Economic Research Institute» ұйымдастырып отырған айтулы шараның биылғы тақырыбы: «Жібек жолы: Азияны өзгермелі әлеммен біріктіру».

Қазақстан елордасына банкпен байланыс орнатқан мемлекеттерден 3 мыңнан астам делегат келді. Оның ішінде шетелдік қаржы министрлері, ірі халықаралық қаржы ұйымдары мен компания басшылары бар.

Ұйымдастырушылардың айтуынша, мұндай ауқымды отырысты өткізу Қазақстанның инвестициялық әлеуетін көрсетуге мүмкіндік береді және еліміздің халықаралық аренадағы мәртебесін нығайта түсуге септігін тигізбек.

Қазақстанның Азия даму банкімен ынтымақтастығы 1994 жылы орнаған. Осы уақыт аралығында қаржы институты Қазақстанға 2 миллиард АҚШ долларынан астам қаржылай көмек көрсетті.

Ал, 2012 жылы Қазақстан оның қорына қомақты қаржы салып, Азия даму банкінің доноры атанды. Еліміздегі еңселі жоба «Батыс Қытай – Батыс Еуропа» халықаралық транзиттік автомобиль дәлізін қаржыландыру осы банктің еншісінде.

Шара 5 мамырға дейін жалғасады.

Бөлісу