Жаңалықтарды Telegram арнамыздан оқыңыз!
Туыстық сипаттағы қос операцияда қыздары аналарына өз бауырларының жартысынан көп бөлігін берген. Қазір науқастар отандық медицинаның озық технологиясы мен білікті мамандардың арқасында аяқтарынан тік тұрды.
Бауырын алмастырған науқастың бірі - Әлиман Райымбекқызы. Бауыры ауырғанына 4-5 жылдан асыпты. Әбден асқынған соң еміне шипа іздеп, Түркия, Қытай елдерінің мамандарына жүгінеді.
Бірақ, ем қонбай, осыдан 1 ай бұрын өлім мен өмір арасында қаладағы №7 қалалық клиникалық ауруханасына түседі. Жедел операция жасалып, 8 сағатта білікті дәрігерлер көмегімен қызының 70 пайыз бауыры анасына алынып салынады.
Әлиман Райымбекқызы, науқас:
Қазір денсаулығым жақсы. Отандық дәрігерлерге алғысым шексіз.
Жанаргүл Шайзада, донор:
Шыққаныма міне, 2 апта болды, Аллаға шүкір, жүріп жүрмін. Анама күнде келемін. Қуаныштымын, осындай халге жеткеніме.
Статистикаға сүйенсек, қазір әлемде бауыр церрозына шалдыққандардың 1 жылда 70 пайызы қайтыс болады. Біздің елдегі көрсеткіш те мәз емес.
Сондықтан, елдегі ең іргелі 4 орталық соңғы жылдары бауыр алмастыруды қолға алды. Бүгінге дейін 25 операция жасалыпты. Әйткенмен, донор тапшылығынан сау бауырға қол жеткізе алмай жүргендер көп.
Болатбек Баймаханов, №7 қалалық клиникалық аурухананың бас дәрігері:
Бізде жылына 400-500 бауыр ауыстыру операциясы жасалуы керек. Биыл Қазақстанда 50-ден астам осындай ота жасалады деген жоспар бар.
«Саламатты Қазақстан» бағдарламасы аясында №7 қалалық клиникалық аурухана осыдан 3 жыл бұрын арнайы жобаны қолға алды.
Былтыр үнділік мамандармен жыл аяғында 1 науқастың бауырын ауыстырған. Мынау - үшіншісі. Жыл соңына дейін тағы 10 операция жасауды жоспарлап отыр.
Жазира ИСАЕВА
