Әлем экономикасы әлсіреп барады

Мұны аптаның ортасында Халықаралық валюта қоры ескертті.

Әлем экономикасы әлсіреп барады. Және де ол оқыс сілкіністердің алдында дәрменсіз. Мұны аптаның ортасында Халықаралық валюта қоры ескертті.

Ұйым сарапшыларының мәліметіне жүгінсек, ғаламдық өндірістегі құлдырауға қаржылық тұрақсыздық пен активтердің арзандауы себепші. Бұл туралы баяндама Шанхайда «Үлкен жиырмалық» елдерінің қаржы министрлері мен орталық банк басшыларының кездесуі қарсаңында жарияланды.

Қордың болжамынша, биыл дүниежүзілік жалпы ішкі өнім 3,4 пайызға артады. Бірақ, мұнай бағасының түсуі, геосаяси жанжалдар, Қытайдан капиталдың көптеп қашуы осы көрсеткіштің өзін төмендетіп жіберуі мүмкін.

Сонымен қатар, Шанхай жиынында Ұлыбританияның Еуропа одағынан шығу ниеті, Таяу Шығыс елдеріндегі соғыстан қашқан мигранттар мәселесі, Қытай экономикасының баяулауы да жан-жақты талқыланды.

Қытай демекші, оның Мемлекеттік кеңесінің премьері бейнежолдау арқылы мәлімдегендей, ғаламдық өндіріс қарқынын одан әрі әлсіретпеу үшін дамыған және дамушы елдер күш біріктіруі керек.

Ли Кэцян, Қытай Мемлекеттік кеңесінің премьері:
Макроэкономикалық саясат үйлесімділігі әрі қарай нығаюы керек. Әлемдегі экономикалық және қаржылық жағдай тіпті күрделене түсуі мүмкін. Сондықтан, дүниежүзі елдерінің күш біріктіп, қиындықтарға төтеп беретін уақыты жетті.

Арыстан РЫСБЕК