Басрада мыңдаған адам әскер қатарына өтті

Иракта сан мың адам соғысқа аттанып жатыр. Бүгіннің өзінде Басра қаласының стадионына 5 мың азамат жиналып, өз еріктерімен әскер қатарына жазылды.

 

Көбі бұрын Отан алдында борышын өтеген. Алдағы күндері олар тағы да қысқа мерзімдік дайындықтан өтіп, бүкіл ел аумағын жиһадшылардан қорғауға кіріседі.

 

Бұған дейін Аятолла Әли әс-Систани шииттерді қолға қару алып, сүнниттік содырларға тойтарыс беруге шақырған болатын. Содан бері ел аумағында мыңдаған адам армия қатарына өтті.

 

Ал, «Ирак пен Леван Ислам мемлекеті» ұйымы солтүстік пен батыс аймақтарды басып алып, бүгінде Бағдадты алуға күш салып жатыр.

 

Олардың мақсаты - Ирак пен Сирия жеріне шариғат заңдарын енгізіп, сүнниттік халифат құру.

 

Арыстан РЫСБЕК