Ливияда премьер-министр кеңсесіне шабуыл жасалды

Ливияда жаңа премьер-министр Ахмед Майтыгтың кеңсесіне гранататқыштардан оқ жаудырылды. Алдын ала деректерге қарағанда, шабуылдан ешкім зардап шеккен жоқ. Бұл кезде Майтыг ғимараттың ішінде болмаған.

 

Әуелде сәрсенбі күні біреулер өткен айда исламшылдарға соғыс жариялаған отставкадағы генерал Халиф Хафтарға қастандық жасаған еді. Жанкешті Абьяр қаласында қудалауға ұшыраған әскербасының штаб-пәтері жанында миналанған көлікті жарған. Соның салдарынан 5 адам қаза тапты. Ал нысанның ішінде болған Хафтардың өзі жапа шекпеді.

 

Соңғы кездері саяси дағдарысқа ұшыраған Ливияда қос үкімет орнап отыр. Елде Абдалла Әбдүррахман ат-Тани мен бизнесмен Ахмед Майтыг басшылығындағы екі үкімет бар. Майтыгтың кандидатурасын парламент қажетті кворумсыз бекіткен. Ал ат-Тани қызметінінен кетуден бас тартып отыр.

 

 

Мадина МҰҚАНОВА