Басты Жаңалықтар Кәсіпкерлердің ісі ілгерілеп келеді

Кәсіпкерлердің ісі ілгерілеп келеді

03.06.2014 05:30

Елдегі кәсіпкерліктің 30 пайызы Алматыда шоғырланған. Сондай-ақ, қала бюджетінің 65 пайызы орта және шағын бизнестегі кәсіпкерлерден түскен салықтан тұрады.

Бір сөзбен айтқанда, Алматы - бүгінде ел экономикасының локомотиві ғана емес, нағыз бизнес алаңына айналып отыр. Бұл туралы бүгін Алматыда өткен кәсіпкерлердің бірінші мәжілісінде айтылды.

500-ге жуық кәсіпкер қатысқан қалалық бизнес-құрылтай Ұлттық кәсіпкерлер палатасының съезі қарсаңында ұйымдастырылып, онда бизнесті өркендетудің жолдары талқыланды.

Кәсіпкерлердің айтуларынша, Елбасы жарлығымен 1-сәуірден күшіне енген мораторий аясында әкімшілік кедергілер жойылып, істі ілгерілету жеңілдеді. Бірақ әлі де кейбір заңнама, Салық кодексінде кедергілер бар.

Осы мәселелер оң шешім тапса, келер жылдан Еуразиялық экономикалық одақ шеңберінде кәсібімізді дөңгелетуге мүмкіндік мол, дейді кәсіп иелері.

Ерлан Стамбеков, Алматы қалалық кәсіпкерлер палатасының директоры:

Алматы кәсіпкерлері бұл мәжіліске үлкен дайындықпен келді. Тәжірибе де, жетістік те жеткілікті. Бірақ жуырда үш ел басшылары Еуразиялық экономикалық одаққа қол қойғанын білесіздер. Мұндай маңызды қадам - біздің кәсіпкерлердің алдына жаңа сынақтар мен міндеттер қойып отыр. Сондықтан, жаңа белеске аттанбас бұрын осылай бас қосып, ортақ мәселелерді бірлесіп шешсек, ұтарымыз мол болмақ.

Жазира ИСАЕВА

Бөлісу