Басты Жаңалықтар Қазақстанға жыл сайын 300 шетелдік комбаин жеткізіледі

Қазақстанға жыл сайын 300 шетелдік комбаин жеткізіледі

23.04.2014 05:30

Қазақстанға жыл сайын 300 шетелдік комбаин жеңілдетілген бағамен жеткізіледі. Еуразиялық экономикалық одақ комиссиясының шешімімен шетелден техника әкелуге осындай көлемде квота бөлінген.

Бүгін Орталық коммуникациялар қызметінде елдегі агроөнеркәсіптік кешен және интеграциялық байланыстар мәселесі сөз болды.

Жиынға «Азық-түлік корпорациясы» АҚ өкілдері де қатысты. Астық экспортымен айналысатын ұлттық компания тек биылдың өзінде 9,5 миллион тонна астық эскпорттауды жоспарлап отыр.

Былтыр бұл көрсеткіш 7,3 миллион тонна болатын. Жалпы, Қазақстан соңғы 5 жылда әлемдегі бидай экспорттаушы ірі 7 елдің қатарына кірді. Кедендік одақтың құрылуымен Ресей де Қазақстан астығына қызығушылық таныта бастаған. 2009 жылдары 100 мың тонна астық алса, былтыр бұл көрсеткіш 1 миллион тоннадан асқан.

Астық экспорты - елдің стратегиялық бағыттарының бірі. Сондықтан, алдағы уақытта тауарды тасымалдау үшін елден тысқары жерлерде бірнеше терминал салу жоспарлануда.

Нұрбек Дайырбеков, «Азық-түлік корпорациясы» ҰК» АҚ-ның басқарушы директоры, коммерциялық директоры:

Экспорт әлеуетін арттыру үшін Түркіменстан мен Иран шекарасында терминал салу жұмыстары жоспарлануда. Біздің корпорация сондай-ақ, Қытай бағытында да астық тасымалын дамыту мақсатында Қытай-Қазақ шекарасында да терминал салуды жоспарлауда.

Дулат АБИБУЛЛАЕВ

Бөлісу