Рудный қаласының батыс айналма жолы толық жөнделді

Қостанай облысында Рудный қаласының батыс айналма жолы жаңартылып, пайдалануға берілді. Өткен ғасырдың алпысыншы жылдары салынған бұл учаске соңғы рет 46 жыл бұрын жөндеуден өткен. Бұл жұмысқа барлығы 971 млн теңге қаражат жұмсалды. Жолға жаңа асфальт төселіп, жиектері бекітілді. Бұл бағытпен транзиттік көліктер қатынайтындықтан, жолдың жаңаруы қозғалыс қауіпсіздігін арттырып, өңіраралық қатынасты жеңілдетеді.

Аслан Ахмет, «Қазавтожол» ҰК Ақ сапаны бақылау бөлімінің бас маманы:

Мемлекет басшысының тапсырмасына сәйкес ресмкбликалық маңызы бар жолдарды ауқымды жөндеу жұмыстары жүргізуде. Бүгінгі таңда Қостанай облысындағы республикалық маңызы бар Рудный қаласының басты айналма жолын орташа жөндеу жұмыстары аяқталып, пайдалануға тапсырып жатырмыз. Елу жұмыс бірлігі, 30-дан астам техника жұмылдырылды.