Құтқарушылар ауруханаға жете алмаған сәбиге көмекке келді

Ақтөбе облысында ақтүтек боранда ауылдан шыға алмай қалған бір жастағы бала мен оның анасы құтқарылды. Оқиға өткен түнде Хромтау ауданында болды. Никельтау ауылында тұратын сәбидің денсаулығы нашарлап, оны шұғыл түрде ауруханаға жеткізу қажеттігі туындаған. Ал жолдар жабық еді. Төтенше жағдайлар департаментінің қызметкерлері елді мекенге жол талғамайтын арнайы көлікпен барып, сәбиді анасымен бірге Хромтау аудандық ауруханасына аман-есен жеткізді. Дәрігерлердің айтуынша, олардың өміріне ешқандай қауіп жоқ.