Президент АҚШ елшісін қабылдады

Мемлекет басшысы АҚШ елшісі Джули Стаффтты қабылдады. Президент Қазақстан мен Америка Құрама Штаттары арасындағы ынтымақ қарқынды дамып келе жатқанын атап өтті. Қасым-Жомарт Тоқаев сауда-экономикалық және инвестициялық ықпалдастықты одан әрі нығайтудың және келісімдерді сапалы іске асырудың маңызына назар аударды. Елші Президент Дональд Трамптың ризашылығы мен ізгі тілегін жеткізіп, Құрама Штаттардың Қазақстанмен кеңейтілген стратегиялық серіктестікті жан-жақты дамытуға бейіл екенін айтты. Джули Стаффт елімізде жүргізіліп жатқан саяси реформаларға оң баға беріп, жаңа Конституция жобасы бойынша референдумның табысты өтуіне тілектестігін білдірді. Әңгімелесу барысында Бейбітшілік кеңесі аясындағы қарым-қатынас перспективасы қарастырылды.