Ұлттық құрылтай – қоғамдағы өзекті шешімдердің алаңы

Қызылордада ұлттық құрылтайдың екі секциялық отырысы аяқталды. Бүгінгі жиындарға 100-ден астам құрылтай мүшесі қатысып жатыр. Қазір әріптесім Оңғар Алпысбайұлы бізбен тікелей эфирге қосылуға дайын тұр. Оңғар, панельдік секцияларда қандай мәселелер көтерілді?

Оңғар Алпысбайұлы, тілші:

Иә, Қонысбек, түске дейін әлеуметтік-мәдени даму, білім мен ғылым секциялары өтті. Ал, түстен кейін азаматтық қоғам және экономикалық даму бағыттары бойынша секциялар жоспарланған. Түске дейінгі жиындарда айтылған ауқымды мәселелерді жиынға қатысқан Ұлттық Құрылтайдың мүшесі Раиса Сайран Қадырдан сұрап білейік. Раиса ханым, Сізге жақын тақырып, кітап мәселесінен бастасақ. Бұған дейінгі құрылтайларда ұлттық кітап күні белгіленді, ал былтыр Бурабайдағы жиында кітап индустриясын көтеру үшін ұлттық жоба құру керек деді.

Иә, көтерілген мәселелердің бірі де ескерусіз қалмайды. Барлық ұсыныстар Ұлттық құрылтайдың хатшылығы арқылы мұқият зерделеніп, тиісті қорытындылар жасалады. Бүгінге дейін өткен төрт құрылтай отырысының қорытындысы бойынша барлығы 26 заң қабылданған. Тағы 10 заң жобасы қазір Парламенттің қарауында. Мәселен тұрмыстық зорлық-зомбылық, есірткіге қарсы күрес, вейпке тыйым мәселелері, «Әділетті Қазақстан», «Таза Қазақстан», еңбек адамы тұжырымдамалары да осы құрылтайда көтерілген. Сондықтан ұлттық құрылтай қоғамдағы мәселелерді талқылап қана қоймай, нақты шешу жолдарын ұсынатын маңызды алаң деп нақты айта аламыз.