Тауар өндірушілерге арналған реестр іске қосылады

Елде 1 қаңтардан бастап отандық тауар өндірушілер реестрі жұмыс істейді. Енді мемлекеттік қолдау тек осы тізімдегі кәсіпкерлерге көрсетіледі. Мемлекеттік сатып алуға қатысу үшін де жүйеге тіркелу  шарт. Бұл туралы Үкіметтің баспасөз қызметі айтты. Реестрге e-ondiris сайты арқылы кіруге болады. Онда өндіріс орныңыздың бар екені туралы құжатты тіркесеңіз жеткілікті. Қалған деректерді жүйе базадан алып, автоматты түрде жүктейді. Тізімге енген кәсіпкерлерді құзырлы органдар оқтын-оқтын тексеріп, мониторинг жүргізіп отырады. Осылайша, мемлекеттік көмек шынында өндіріс орны бар кәсіпкерлерге ғана көрсетіледі.