Алматыда 2 жұмысшы тоққа түсіп қалды

Алматыдағы «Жастар» тұрғын үй кешенінде екі электрик токқа түсті. Куәгерлердің айтуынша, жұмысшылардың киімдері лезде жанып кеткен. Яғни, жалын бірден тұтанып, күйік шалған екеу есінен танып қалған. Оқиға орнына дереу келген жедел жәрдем қызметі зардап шеккендерге алғашқы медициналық көмек көрсетіп, оларды ауруханаға алып кеткен. Қалалық Денсаулық сақтау басқармасының мәліметінше, екі ер адамның денелерін II–III дәрежедегі күйік шалған. Қазір науқастар аурухананың анестезиология, реанимация және қарқынды бөлімшесіне жатқызылды. Алмалы аудандық Полиция басқармасы осы оқиға бойынша тексеру шараларын жүргізуде. Келеңсіз жағдай кімнің кінәсінен орын алғаны анықталып, заң аясында шара қолданылады.

Айнұр Әбілқасымқызы