Жаңалықтарды Telegram арнамыздан оқыңыз!Болашақта түстік тұрғындарының саны көбейіп, теріскей халқының қатары керісінше азаюы мүмкін. Бұл - сарапшылардың пікірі. Мемлекет басшысы Бурабайда өткен Ұлттық құрылтайда Үкіметке аталған мәселемен мұқият айналысуды тапсырды. Демографиялық проблеманы қалай реттеген дұрыс? Ұлттық арна тілшілері өңір тұрғындарының пікірін білген еді.
Болат Заутұлы, Дүниежүзі қазақтарының қауымдастығы Павлодар облыстық филиалының басшысы:
Ішкі көштен 3060 адам квота, этникалық қазақтардан 1050 адам квотамен келуге тиісті. Біздің облысқа адамдар келген жоқ. Бұрынғыдай көші-қон мекемесі адамдарды өздері қабылдамайды, ақпараттық жүйе бойынша онлайн тапсыруға жүктелген. Онлайн тапсыруға мемлекеттік қызмет көрсету тетіктері толық қаралмаған.
Абзалбек Мұхаммеджанов, Марқакөл ауылының тұрғыны:
Жаңадан кәсіп бастаймын дегендер бар. Соларға жеңілдетілген несие берілсе? Не болмаса кәсібін кеңейтем дегендерге сол әлгі жеңілдетілген 2,5 пайыздықпен несиелер берілсе? Сонда кішкене жұмыс ілгері басар еді деп ойлаймын.
Жеңіс Асанов, «Amanat» партиясы СҚОФ атқарушы хатшысы:
Көптеген аймақтардың басты проблемасы — инфрақұрылымның әлсіздігі. Заманауи жолдар, сапалы білім, медициналық қызметтер мен жұмыс орындары болмаса, адамдар үлкен қалаларға кетуге мәжбүр болады. Сондықтан қажетті ресурстарды шалғай елдімекендерге, шекаралас аудандарға, шағын қалаларға бағыттау қажет.
Эльмира Кәленова
