Жаңалықтарды Telegram арнамыздан оқыңыз!Алматыда тағы да бала өліміне әкелген жантүршігерлік жол апаты болды. Байзақов көшесінің бойында 7 жасар бүлдіршінді жеңіл көлік қағып, ол оқиға орнында тіл тартпай кетті.
Куәгерлердің сөзінше, жеткіншек жолды белгіленбеген жерден кесіп өткен. Сол сәтте оны жеңіл көлік қағып, қатты соққыдан қарсы бағытта келе жатқан автомобильге барып соғылған. Полиция жүргізуші қамауға алынып, қылмыстық іс қозғалғанын хабарлады.
Баланы басып кеткен жүк көлігінің жүргізушісі қамауға алынды
Дәл осындай қайғылы жағдай кеше Алатау ауданында да болған еді. Боралдай көшесімен келе жатқан ауыр жүк көлігі 2017 жылы туған баланы басып кеткен. Бүлдіршін оқиға орнында мерт болды. Видеожазбада баланың жаяу жүргіншілер жолағымен жолдан өтпек болғаны көрінеді. Сол сәтте жолаушылар автобусы бүлдіршіннің алдын кесіп өткен.
Оны айналып өтпек болған бала жүк көлігінің астына түскен. Сұмдығы - қайғылы жағдай анасының көз алдында болды. Бүгін марқұмды туыстары ақтық сапарға шығарып салды. Қабырғасы қайысқан жақындары автобус жүргізушісін де жауапқа тартуды сұрап отыр. Қазір құқық қорғау органдары оқиғаның мән-жайын анықтап жатыр.
Шухрат Ментеев, марқұмның туысы:
Мен автобус жүргізушісін де жазаға тартуды талап етемін. Оның жоғары жылдамдықпен жүйіткіп келе жатқанын көріп, бала артқа шегінбегенде мұндай жағдай болмас еді. Екі көлік жүргізушісі де кінәлі. Заң аясында жауап берсін.
Салтанат Әзірбек, қалалық ПД ресми өкілі:
Reno маркалы жүк көлігінің жүргізушісі бірден қамауға алынды. Уақытша оқшаулау абақтысында. Қылмысты жүргізу кодексінің 128-бабының нормаларына сай. Осы оқиғаға қатысы бар болуы мүмкін тұлғалар анықталып, әрқайсысының іс-әрекетіне құқықтық баға берілетін болады.
Қуан Нұрақын
