Жаңалықтарды Telegram арнамыздан оқыңыз!Алматы облысында заңсыз қоқыс алаңы тазартылды. 40 мыңнан аса тұрғыны бар Кемертоған ауылы мен Байтөбе саяжайы тоғыз жолдың торабында орналасқан. Сондай-ақ бұл елдімекендер облысты Үлкен Алматы айналма автомобиль жолы арқылы Алматы қаласымен байланыстырады. «Таза Қазақстан» акциясына қатысушылар осы аумақты толықтай тазартпақ. «Amanat» партиясы алдағы уақытта бұл жерге бейнебақылау камераларын орнатып, құқық қорғау органдары мен қоғамдық тәртіп сақшыларының бақылауын күшейтуді ұсынды. Бұл мәселе партиялық бақылау комиссиясының алдағы отырысында қаралады - дейді партия өкілдері. 70-тен аса тұрғын белсенділік танытқан шарада 12 тонна тұрмыстық қалдық жиналды.
Қаныбек Айтжанов, «Amanat» партиясы Қарасай аудандық филиалының төрағасы:
Бұл «Таза Қазақстан» тек қана экологияның тазалығы емес, адамның жүрегінің тазалығы. Адамның ой-өрісінің тазалығы болады. Өйткені, жастарға деген дұрыс тәрбие болуы керек. Сонда мынадай жағдайға түспейміз.
Тазалық акциясы Қонаев қаласында да жалғасын тапты. Шараға 200-ден аса адам атсалысты. Жергілікті тұрғындар, жастар, белсенділер мен қоғамдық ұйым өкілдері жағажайды тұрмыстық қалдықтардан, пластик бөтелкелерден, қағаздардан және басқа да қоқыстардан тазартты. Барлығы 3 тоннадан аса қоқыс жиналды. Сондай-ақ акция аясында қатысушыларға қоршаған ортаны қорғаудың маңыздылығы түсіндіріліп, экологиялық тәрбие жұмыстары жүргізілді.
Қуан Нұрақын
