Жаңалықтарды Telegram арнамыздан оқыңыз!Нұрғиса Тілендиев – бір дәуірдің дара тұлғасы. Оның шығармаларынан қазақтың кең даласын, асқақ та биік рухын терең сезінуге болады. Нұрғисаның музыкасы – тек бір кезеңнің туындысы емес, ол ғасырлар бойы сақталатын асыл мұра. Тілендиевтің күйлері мен оркестрлік композициялары, әсем әуендері қазақ мәдениетінің алтын қорына енді. Бітімі бөлек аңыз адам туралы Жазира Оразқызының репортажында.
Жазира Оразқызы, тілші:
Дәл сол «Дариға домбыра» - осы. Н.Тілендиев музейіндегі құнды жәдігерлердің бірі. 88 жылдық тарихы бар аспапты композитордың ұлы ұстазы Ахмет Жұбанов арнайы тапсырыспен жасатып, өз қолымен табыстаған. Өзінің сүйікті бала домбырасына Нұрғиса Тілендиев жары Дариғаның есімін берген.
Дүлдүл домбырашы. Ұлы сазгер. Өз шыңына жеткен шебер дирижер. Қазақты әнімен әуелетіп, күйімен күмбірлеткен дарын иесі туралы тізбектеп айта бересің. Нұрғиса Тілендиев – қазақтың қара домбырасына жан бітіріп, қазақ өнерін көкке көтерген кемел тұлға.
Асанәлі Әшімов, ҚР Халық әртісі, Қазақстанның Еңбек ері:
«Қыз Жібек» фильмінің үлкен дәрежеге жетуінің 50 пайызы осы музыкаға байланысты болды. Сол музыканы Нұрғиса домбыраны алып, экранға қарап отырып жазды. Нұрғисаның биіктігі сондай, оған тең келетін адам жоқ. Нұрғиса мәңгілік қой.
Тілендиев төл өнерді терең сезінді, оны халықтың жүрегіне жеткізе білді. Ұлы сазгер – 500-ден астам шығарманың авторы. Оның ішінде ән, күй, романс, опера және балет те бар.
Айрықша талант иесі – асқақ Алатаудың тумасы. Іле ауданының Шилікемер ауылында 1925 жылдың 1 сәуірінде өмірге келген. Қазір бұл ауыл біртуар тұлғаның есімімен аталады.
Жазира Оразқызы
