Жаңалықтарды Telegram арнамыздан оқыңыз!Петропавлда былтыр көктемде қарғын судың астында қалған Заречный шағын ауданының тұрғындары заттарын жинап, тасқынға әзірленіп жатыр.
Жауапты органдар үй-үйді аралап, эвакуацияға дайындалу қажеттігін ескерткен. Былтыр Заречный шағын аудананында 450-ден астам үйді су басқан болатын. Оның жартысына жуығы жөндеуге жарамсыз деп танылды. Ал биыл қалалық әкімдік қалған тұрғындарды басқа жаққа көшіріп, шағын ауданды жабу жөнінде шешім шығарды. Тұрғындар бюджет есебінен баспанамен қамтылмақ. Ал Заречный кентіне іргелес орналасқан саяжай учаскесінде тұрып жатқан отбасыларға үй берілмейді. Шағын ауданды су басса, тұрғындардың тағдыры не болары белгісіз.
Раушан Әбдірахманова, Заречный шағын ауданының тұрғыны:
Былтыр үйдің шатырына дейін су басып қалды. Биыл жиһаздың барлығын қоймаға апарайын деп жатырмыз. Тасқын басталса, дайын отыруымыз керек. Ал өзіміз бастапқыда эвакуациялық пунктті паналаймыз, одан кейін баратын жеріміз жоқ.
Колледждер мен мектептерде эвакуациялық пункттер әзірленді. Сонымен қатар қалалық әкімдік тұрмыстық техника мен жиһазды уақытша сақтауға арналған қойма әзірледі. Елдімекен іргесіндегі бөгетті нығайту жұмыстары жалғасуда.
Әсем Айтолла, Петропавл қалалық әкімдігінің баспасөз хатшысы:
Өткен жылы бөгет салу бойынша жұмыстар басталған болатын. Биылға дейін жалғасты. Жалпы ұзындығы 1200 метр. Биіктігі 101,2 метр. Қазіргі таңда бұл жерде су шайып кетпейтін төсеме жайылып жатыр.
Эльмира Кәленова
