Жаңалықтарды Telegram арнамыздан оқыңыз!Тігінші болу үшін көздің қырағылығы мен қолдың ептілігі керек. Ал олардың бірі кем болса қиынның қиыны. Балқаш қаласының тұрғыны Сайлаутай Малыбаева көз жанары нашар көрсе де бұл саланың нағыз шебері. Маман иесімен өңірдегі тілшіміз Жандос Бақытұлы тілдесіп қайтты.
Сайлаутай Малыбаеваның көру қабылеті туғанынан нашар. Қазір 2-топтағы мүгедек. Бірақ онысына қарамай 30 жылдан бері тігінші болып еңбек етеді. Басында біршама қиындыққа тап болғанымен, қайсар мінезінің арқасында бұл саланы жетік меңгерген.
Сайлаутай Малыбаева, тігінші:
Жұмыс істейміз, өзіме ұнайды жақсы. Жұмыс көп, әр түрлі жақтан тапсырыс келеді. Қабылдап тіге береміз. Үйде жатқаннан жұмыс істеген жақсы. Жүреміз, жаттығу жасаймыз. Уақыт тауып дойбы ойнаймыз. Зейнеткерлер, мүгедектігі бар жандардың бәріне жұмыс табылады.
Тігін цехында жұмыс істейтін 15 адамның 8-інің мүгедектігі бар. Барлығы өмір сынағына сынбай, адал еңбегімен ақысын тауып, күн көруде. Әріптестері бұны еңбекке емес ерлікке балайды.
Дархан Құматов, Балқаш қаласы оқу-өндірістік кәсіпорынының директоры:
Қоғамдық жұмыс орны деген ол Үкімет тарапынан бір жылға келісімшарт жасалады. Біз жұмыспен қамтамассыз етеміз әр түрлі бағытта. Ол кісілердің айлығы санат бойынша белгіленеді. Мысалы жұмыссыздар келеді, олардың жалақысы басқа, мүгедектігі бар адамдар 1,2,3-топтағылардың сомасы әртүрлі.
80 мың тұрғыны бар Балқаш қаласында өндірістік кәсіпорындар жеткілікті. Сондықтан тұрғындардың дені жұмысшы мамандығын таңдайды. Былтыр 2000 адам Мансап орталығы арқылы жұмысқа орналасқан. Оның 150-і мүгедектігі бар жандар.
Азамат Саданов, Балқаш қаласы «Мансап» орталығының директоры:
Екі мүгедектігі бар адам грант алып 400 АЕК көлемінде өз ісін жалғастыруда. «Күміс жас» жобасы аясында мүгедектігі бар 15 адам жұмысқа орналастырылды. Енді ағымдағы жылы осы жұмыссыз жүрген адамдарды жұмысшы мамандықтары бойынша оқыту жоспарлануда. Жастарды әсіресе тартып, түсіндіру жұмысын жүргізіп жатырмыз.
Бүгінде жастарға да түсіндірме жұмыстары жүргізілуде. Себебі жергілікті кәсіпорындарда слесарь, сантехник, токарь, машинист және көлік жүргізушісі сынды қарапайым мамандар жетіспейді.
Жандос Бақытұлы
