Жаңалықтарды Telegram арнамыздан оқыңыз!Енді ескі темір тұлпар тізгіндегендер Алматыға кіру үшін ақы төлейді. Сондай-ақ биылдан бастап мегаполистегі автотұрақтардың бағасы өседі. Бұл туралы қала әкімі Медеу ауданы тұрғындарымен кездесуінде айтты. Ерболат Досаевтың сөзінше, қабылданған шешімдер шаһардың экологиялық ахуалын жақсартуға және кептелісті реттеуге септігін тигізеді. Ал бұл бастама қашан, қалай жүзеге аспақ?
Ескі көлік дегеніміз қай жылғы көлік? Әлде темір тұлпардың техникалық жағдайына қарай ақы төлене ме? Әзірге бұл сұрақтардың жауабы белгісіз. Алдағы уақытта қоғамдық талқылау арқылы нақты шарттары бекітіледі. Белгілісі су жаңа техникалар мен электрлі көлік иелері үшін жол жүру тегін болмақ. Бүгінде мегаполистің экологиялық ахуалын жақсарту үшін 2025-27 жылдарға арналған бағдарлама әзірленген. Жоспар бойынша алғашқы шектеулер келесі жылдың соңына қарай енгізіле бастайды.
Ерболат Досаев, қала әкімі:
Көлік реформасын 2026 жылдың соңына дейін толығымен аяқтау жоспарланған. Шектеулер төлем арқылы болады. Мысалы, Алматыда тіркелген көлік заманауи экологиялық талаптарға сай келмесе, көлік иесі қаланың кей аймақтарына кіру үшін ақы төлейді. Біз қазір бұл бағыттағы жұмыстарды жетілдіру үстіндеміз.
Алматыда ресми 635 мыңнан астам темір тұлпар тіркелген. Сондай-ақ күн сайын қалаға сырттан 400 мыңға жуық автомобиль қатынайды. Бір ғана транспорттық техникадан көміртегі оксиді, күкірт диоксиді, формальдегид, бензол сынды 200-ден астам зиянды зат бөлінеді. Сондықтан бұл түтінге тұншыққан қаланы тазалаудың тиімді тәсілі дейді, урбанист Гүлмира Байғабұлова. Тек бастаманы жүзеге асыру үшін арнайы автотұрақтарды дайындап, халыққа жайлы жағдай жасау керек екенін алға тартты.
Гүлмира Байғабұлова, урбанист:
Адамдар келіспеуі мүмкін. Бірақ қоғамдық көліктің жағдайын жасаса, комфорт, таза, кондиционермен болса, адамдар өз таңдауын жасайды. Тұрақ салу қиын емес, негізі. Тез салуға болады. Қаланың әр бұрышына қадағалаған жерлеріне, қай жақта ең экологиялық сезімтал районды білу керек, сол жерлерге тұрақ салып, автобустардың маршруттарын алу керек. Автобус болсын, трамвай болсын, жіберу керек. Трамвай жіберсе, тіпті жақсы болар еді.
Әлемдік тәжірибеге сүйеніп шығарылған шешімді әркім әр түрлі қабыладады. Тұрғындардың кейбірі қолдаса, енді бірі түбегейлі қарсы.
Алматыдағы ауаға қатысты әнгіменің ауаны барлығына белгілі. Оны шешу үшін көлік қозғалысына шектеу қою біраздан бері айтылып жүр. Тек жоспарды іске асыратын жүйелі реформа болса игі, дейді сарапшылар.
Ернұр Медет
