Жаңалықтарды Telegram арнамыздан оқыңыз!Ғылым – елімізді дамыту жолында стратегиялық маңызға ие. Осылай деген Сенат төрағасы Алматыда өткен «Ғылым және технологиялық саясат туралы» заңды іске асыру мәселелері талқыланған жиынға қатысты. Басқосуға қатысушылар негізгі міндеттерді белгілеп, ғылымды дамыту, инновацияларды енгізу және елдің бәсекеге қабілеттілігін арттыру жөнінде ойымен бөлісіп, өз ұсыныстарын айтты.
Шарада сөз алған Мәулен Әшімбаев Мемлекет басшысының ғылымды дамытуға әрдайым баса мән беріп келе жатқанын атап өтті. Былтыр осы бағытты дамытуға негізделген «Ғылым және технологиялық саясат» туралы жаңа заң қабылданды.
Мәулен Әшімбаев, ҚР Парламенті Сенатының төрағасы:
Экономикаға, соның ішінде ғылыми жетістіктерді енгізуге, сондай-ақ ғылыми техникалық және инновациялық қызметті тиімді үйлестіруге жол ашты. Заңның қабылдануы ғылым саласындағы ауқымды реформаларға тың серпін бергені анық.
Соңғы 4 жылда ғылымды қаржыландыру 3 есеге ұлғайды. Ғалымдарды және ғылымдағы жас буынды қолдау қолға алынып, жүйелі жұмыс жүріп жатыр. Шешімін таппай тұрған мәселе де жоқ емес, дейді мамандар.
Мақсат Жабағин, ҚР ҰҒА жанындағы «Жас ғалымдар» кеңесінің төрағасы:
Өңірлерде, әрбір облыста және Шымкент, Астана, Алматы қалаларының жанында өзінің ғылыми кеңестері ашылуы қажет. Ол өңірлік бюджеттен ғылымға арнайы қандай қаражат қажет, оны бөлудің мәселелерін айқындайды.
Мемлекет басшысы заманауи технологияларды белсенді дамытып, инвестиция тарту арқылы бәсекеге қабілетті цифрлық экономика құруымыз тиіс деген болатын. Кездесуде айтылған идеялар мен ұсыныстар мұқият зерделеніп, Жоғары Палатаның алдағы заңнамалық қызметінде ескеріледі, деді Сенат төрағасы.
Қуан Нұрақын
