Басты Жаңалықтар Қарағандылық шаруалар 1 млн тонна қойдың жүнін қоқысқа тастауға мәжбүр

Қарағандылық шаруалар 1 млн тонна қойдың жүнін қоқысқа тастауға мәжбүр

31.10.2024 20:20

Қарағанды облысында 1 миллион тонна қойдың жүні кәдеге аспай құр босқа жатыр. Өнімді өткізе алмаған шаруалар оны өртеп жіберуге мәжбүр. Әйтпесе, мал ауруын туғызады дейді олар. Жеңіл өнеркәсіп үшін таптырмас шикізатқа неге сұраныс жоқ? Мәселе қалай шешіледі? Өңірдегі тілші Жандос Бақытұлы анықтады.

Қанат Отарбаев 25 жыл бойы асылтұқымды қой өсіріп келеді. Бүгінде биязы жүнді қой 10 мыңға жуықтаған. Биязы жүн–кілем, тоқыма өнеркәсібіне таптырмас шикізат. Бірақ сұраныс атымен жоқ. Тіпті алыпсатарлар да биыл төбе көрсетпеген.

Қанат Отарбаев, шаруа қожалығының басшысы:

Қойдың негізгі өнімдерінің бірі жүн. Сол жүнге қазір сұраныс жоқ. Мына артымызда тұрған жабағы жүн көктемгі қырқымдікі. Осы күнге дейін сұраушысы да, алушысы жоқ. Іздеп те жатырмыз. Бұл – өте сапалы жүн.

Қазір жүн ешқайда өтпейді. Жеңіл өнеркәсіп ақсап тұрғандықтан шикізат босқа рәсуа болып жатыр. Оны құрғақ қоймада сақтамаса, ылғал тартып, кейін сапасын жоғалтады. Амалы қалмаған жұрт тонналаған жүнді жағып жібереді немесе қоқыс полигонына төгеді.

Қабдолла Нөкербек, ауыл тұрғыны:

Қойы бар фермерлер бар. Жалғыз жеке меншік секторлар ғана емес. Жүн қабылданбайды. Барлығын қоқысқа апарып тастаймыз.

Жергілікті билік жүнді өткізу, өңдеу ісін дамыту үшін инвестиция тартуға тырысып жатырмыз дейді. Әзірге нәтиже жоқ.

Бауыржан Асанов, облыс әкімінің ауыл шаруашылығы жөніндегі орынбасары:

Мүмкін арзандатылған несие берерміз, әлеуметтік кәсіпкерлік корпорациясы арқылы немесе басқа да қажеттілік, инженерлік-инфрақұрылым қажет болса, оның барлығына біз көмектесуге дайынбыз.

Былтыр облыста 1 миллион тоннадан астам жүн өндірілген. Бұл жылдағыдан 2 пайызға көп. Бірақ өнім көбейгенімен оны өңдейтін өңірде қала берді көрші облыстарда бірде - бір өнеркәсіп жоқ.

Жандос Бақытұлы

Автор

Жандос Бақытұлы

Бөлісу