Жаңалықтарды Telegram арнамыздан оқыңыз!Қазақстан бітімгер әскерін Таяу Шығысқа жібереді. Парламент құжатты мақұлдады. 430 әскери Біріккен Ұлттар Ұйымының Голан жоталары және Оңтүстік Судандағы миссиясына қатыспақ. Қорғаныс министрі Руслан Жақсылықовтың айтуынша, 2014 жылдан бері 600-ден аса қазақстандық офицер мен сарбаз халықаралық ұйымның бітімгерлік шараларына қатысқан. Жіберілетін әскердің құрамында жаңадан армияға алынғандар болмайды. Тек толық дайындықтан өткен, келісім-шарт жасасқан кәсіби қызметкерлер алынады. Бұл алғашқы дербес контингент. Бұған дейін Қазақстан өзге елдер жасағының құрамында қызмет атқарды. Әскерилермен бірге қару-жарақ, техника бірге барады. Бітімгерлерді тасымалдау үшін Қазақстан бюджетінен 8 млн доллар жұмсалмақ.
Руслан Жақсылықов, ҚР Қорғаныс министрі:
Қазақстанға дербес бітімгерлік миссиясының берілуі біздің елдің әлемдік аренадағы беделін көрсетеді. Халықаралық комиссия келіп тексеріп, рұқсат берді. Олар дайындықты өте жоғары бағалады. Бітімгерлікке іріктелген әскерилер жоғары моральдық-іскерлік қасиеті бойынша таңдалды. Біздің әскерилер патрульге шығады, бейбітшілік пен қауіпсіздікті сақтау миссиясын орындайды. Ерекше жағдайларда жауынгерлік күш пен құралдарды қолдануы мүмкін.
Шерхан Жамбылұлы
