Ресейде мектеп оқушылары ата-аналарының келісімінсіз еңбек етуге міндеттеледі

Ресейде мектеп оқушылары ата-аналарының келісімінсіз еңбек етуге міндеттеледі. Мемлекеттік Дума мектептерде еңбек тәрбиесі туралы заңды қабылдады.

Индира Бегайдар, тілші:

Заң жобасын төменгі палата бірден екінші және үшінші оқылымдарда мақұлдады. Енді мектеп оқушылары жас ерекшеліктерін ескере отырып, еңбек етуі керек. Мысалы, сыныптарды жинау, мектеп аумағына ағаш отырғызу. Сонымен қатар, театр костюмдерін тігу және кітапхана, музей қызметкерлеріне көмектесу сияқты жұмыстарға да жегіледі.

1 сыныптан 11 сыныпқа дейін оқитын оқушылар міндеттеледі. Заң «тәрбие процесінде еңбектің рөлін күшейту мақсатында»,- қабылданды дейді депутаттар. Сондай-ақ қолданыстағы заңнамадан мектеп оқушыларын білім беру бағдарламасында көзделмеген еңбекке олардың келісімінсіз немесе ата-аналарының келісімінсіз тартуға тыйым салынған деген норманы алып тастады.

Индира Бегайдар