Екібастұз әкімі ЖЭО басшысын сотқа берді

Екібастұздың ЖЭО-на орталығына қатысты да осы аптада бір жаңалық шықты. Екібастұз әкімі Аян Бейсекин монополисті сотқа беріп, одан 22 млн теңге талап етіп отыр. Осылайша, «Екібастұзжылуэнерго» ЖШС -не қыста бюджеттен берілген 22 млн теңге қаржыны қайтартпақшы. 

Өткен жылдың 27 қарашасында шаһардың жылу желілерінде ақау шығып, жылу электр орталығындағы қазандықтар істен шыққанда монополист компания көмекке жүгінген еді. Сонда аймақтардың коммуналдық шаруашылықтары қол ұшын созды. Ал оларды жанар-жағармай, ыстық тамақ, жататын орынмен қамтамасыз ету үшін төтенше жағдайлар резервінен қаржы бөлінді. «Екібастұзжылуэнерго» енді бұл қаржыны қайтарудан бас тартқан көрінеді.

Гүлжан Зарлықова, Екібастұз қаласы әкімінің орынбасары:

Облыстық мамандандырылған ауданаралық экономикалық сотта іс қаралып жатыр. 22 млн. теңге төтенше жағдай салдарын жою үшін берілген. Бұған дейін «Екібастұзжылуэнерго» ЖШС-і бұл мәселені медиациялық тәртіппен шешуден бас тартқан еді.