Ұлттық арна тілшісі жаңа сайланған депутаттардың қандай тәртіппен отырғызылатынын айтып берді - «Qazaqstan» Ұлттық телеарнасы

Ұлттық арна тілшісі жаңа сайланған депутаттардың қандай тәртіппен отырғызылатынын айтып берді

19.03.2023

Биылғы сайлаудағы тағы бір өзгеріс, мәжіліс депутаттарының мандаты қысқарды. Саяси додадан кейін өтетін мәжіліс отырысындағы таблоға, қатысып отырғандар – 98 деп жазылады. Бұған дейін, яғни Парламенттің Мәжілісінің жетінші шақырылымында 107 депутат болғаны белгілі. Қысқартылған бұл 9 мандат осы уақытқа дейін Қазақстан халқы Ассамблеясы атынан сайланатын депутаттарға тиесілі болатын. Айя Мүтәлі мәжіліс залына барып, жаңа сайланған депутаттардың қандай тәртіппен отырғызылатынын біліп келді.

Айя Мүтәлі, тілші:

Біз сәрсенбі сайын жалпы отырыс өтетін Мәжіліс залында тұрмыз. Депутаттар әр заңды дәл осы жерде қарап, осы залда қабылдайды. Мұнда шамамен 150 адамға арналған орын бар. Төрдегі бұл орынға мәжіліс төрағасы жайғасады. Оның екі жағындағы мына орындарда екі орынбасары отырады. 3 спикердің креслосының жанына мінбер қойылған. Мұнда жаңа заң жобасын ұсынуға келген орган өкілі баяндама оқиды әрі қосымша депутаттардың сауалына жауап береді. Спикерлерден өзге мәжілісмендер жалпы отырыс залында партиялық тізіммен емес, аты-жөнінің әліппедегі реттілігімен жайғасып отырады. Ал мына бұрыштағы орындықтар министрлiктер мен Мәжiлiс Аппаратына арналған. Яғни, жаңа құжатты таныстыруға келген қонақтар сонда жайғасады. Депутаттардың орнына келер болсақ, үстелінде кез келген уақытта пікір білдіру үшін микрофон мен оны қосуға арналған дыбыс күшейткiш жүйе қойылған. Мына жерде депутаттың аты-жөні жазылады. Одан бөлек, дауыс беруге арналған құрал бар. Яғни, заң жобасын қолдаса, депутат 2-ші, қарсы болса 3-ші тетікті басады. Дауыс беру нәтижесін көрсететін табло қазір өшіп тұр. Ал Мәжіліс залында төрт есік бар. Депутаттар отырыс аяқталысымен өзіне ыңғайлы, отырған орнына жақын жақтан шығып кете алады.

Айя Мүтәлі

Хабарламаларға жазылу