Жаңалықтарды Telegram арнамыздан оқыңыз!Кәсібі қауіпті, бірақ, жұмысына жауапты қарапайым еңбек адамдары нағыз құрметке лайық. Сұлухан Жалғасова 16 жылдан бері медициналық бұйымдар шығаратын фабрикада еңбек етіп келеді. Бастапқыда оператор - қаптаушы қызметінен бастаған ол бүгінде цех жетекшісі. «Адал еңбек – бәрін жеңбек» деген ұстанымы бар Сұлухан Жалғасованың күнделікті жұмысы осы: медициналық маскалардың таза әрі талапқа сай болып шығуын қадағалайды.
Сұлухан Жалғасова, цех жетекшісі:
Мына масканы шығару, адамдардың оны тағып, өмірлерін сақтауы өзіме де мақтаныш сезім болады. Өзің еңбек етіп, жүгіріп жүріп, жан-жағыңмен алысып, адамдарға көмектесіп жүріп тапқан еңбек өте тәтті сияқты.
Кәсіпорында бетперденің түр-түрі шығарылады. Шуы қатты станокпен күнделікті аяқтан тік тұрып, 8 сағат бойы жұмыс істеу оңай емес. Әсіресе, пандемия кезінде қызметкерлерге ауыр салмақ түсіп, үлкен жауапкершілік артылған. Бір күнде 200 мың маска шығарған.
Сұлухан Жалғасова - үш перзент тәрбиелеген ардақты ана. Төрт немересі бар. Жұмыстан босай қалса, кішкентайларды қараудың қамына кіріседі.
Маржан Нүсіпбай, қызы:
Отбасын емес, бірінші жұмысын алға қойған адам. Осы жұмыстың арқасында бізді оқытты. Тұрмысқа берді. Анам осы фирманың тірегі десем де болады.
Еңбек адамының несібені маңдай термен табуға деген құлшынысы - көпке үлгі. Білікті маман осы жерден зейнетке шыққысы келеді. Оған дейін талай жасты адал қызмет пен ұқыпты жұмысқа үйретіп кетері анық.
Фариза Мұсақызы
