Тұманды Альбиондағы сайлау учаскесінде өтіп жатқан саяси науқан уақыт ерекшелігіне байланысты енді аяқталмақ

Тұманды Альбиондағы сайлау учаскесінде өтіп жатқан саяси науқан уақыт ерекшелігіне байланысты енді аяқталмақ. Біздің Лондондағы тілшіміз Марина Бекенова соңғы жаңалықтармен бөлісуге дайын.

Сайлау аяқталуға жақын

Марина Бекенова, тілші:
Әріптестер, Қазақстанның Ұлыбританиядағы Елшілігінің жанында орналасқан №244 сайлау учаскесіне келушілердің қарасы сиреді. Лондон уақыты бойынша сағат 8-де ғимарат есігі жабылып, бюлеттеньдерді санау басталады. Елшілік қызметкерлері дауыс беру процесінің ашықтығы мен әділдігін, учаскенің үздіксіз жұмысын, сондай-ақ Қазақстан Республикасы азаматтарының қауіпсіздігі мен денсаулығын қамтамасыз ету үшін бар күшін салды.

Айбек Смағұлов, турист:
Шетелде дауыс беруім бірінші рет. Бір жағынан өзіміздің отандастарымызды көру. Сағынасың бөтен елде жүрген соң.

Болат Саламат, турист:
Жаңадан сайланатын президентіміздің алдына қойған мақсаттары, халқына деген, еліне деген жоспарлары сүйіспеншілікпен жүзеге асады деп ойлаймын, үміттенемін.

Айта кету керек конституциялық құқығын жүзеге асыру үшін Қазақстан Республикасы азаматтары Лондонға Біріккен Корольдіктің түкпір-түкпірінен ат терлетіп келді. Олар Тұманды Альбионда уақытша немесе тұрақты тұрып жатқан отандастарымыз. Комиссия мүшелерінің айтуынша, учаске жабылғаннан кейін бірнеше минуттың ішінде Лондондағы сайлау нәтижелері белгілі болады.

Марина Бекенова