Президент сайлауы: Әр кандидатты қолдау үшін 118 273 сайлаушының қолы жиналуы тиіс

Президенттікке үміткер кандидат ретінде тіркелу үшін кем дегенде 118 мың 273 адамның қолын жинау керек. Бұл дауыс беруге құқығы бар сайлаушылардың 1 пайызы. Бұл туралы бүгін Орталық сайлау комиссиясының отырысында айтылды. 2022 жылдың 1 шілдесіндегі мәлімет бойынша елімізде 11 млн 827 мың 277 сайлаушы бар. Үміткерлер 11 қазан кешкі сағат 18:00-ге  дейін өзін ұсына алады. Бұдан соң кандидаттарды тіркеу, үгіт-насихат секілді шаралар басталады. Сайлау заңнамасы негізінде қол қою парағын беру мерзімі қысқартылды.

Асылбек Смағұлов, ҚР Орталық сайлау комиссиясының мүшесі:
Қол қою парақтары Конституциялық заңда белгіленген талаптарға сәйкестігі тексерілгеннен кейін күнтізбелік 2 күн ішінде беріледі. Аумақтық сайлау комиссияларының кандидатты қолдайтын қолдардың растығын тексеру мерзімі күнтізбелік 10 күннен 5 күнге дейін қысқартылады.