Министрлік мұғалімдерге 30 млрд теңге қарыз

Оқу-ағарту министрлігі мұғалімдерге 30 млрд теңге қарыз болып қалды. Соның салдарынан, педагогтар айлығын, еңбек демалысының ақысы мен емделу өтемақысын ала алмай жүр. Қаражат тапшылығы мамандардың бюджетті жоспарлауға салғырт қарауынан туындаған.

Бұл проблема бүгін мәжілісте көтеріліп, депутат Юлия Кучинская Асхат Аймағамбетовтің атына депутаттық сауал жолдады. Ұстаздардың бір бөлігі мамыр айының айлығын толық көлемде алмапты. 1 маусымда ел бойынша 300 мыңға жуық мұғалім жазғы еңбек демалысына шықты. Бірақ әлі күнге дейін тиісті ақшаларын алмаған.

Депутат министр Асхат Аймағамбетовтен аталған мәселені кешіктірмей шешуді сұрады.