Жаңалықтарды Telegram арнамыздан оқыңыз!Францияда мейрамханаларға, пойыздар мен коммерциялық орталықтарға, бассейндерге, мұражайларға сондай ақ түнгі клубтарға клиенттерді денсаулық паспортымен ғана кіргізу туралы заң күшіне енді. Ал, медицина қызметкерлері қыркүйектің 15-не дейін вакцина салдырмаса, жұмыс істей алмайды. Соңғы мәліметке қарағанда, Францияда тұрғындардың 55 пайызы екпее алған.
Сауд Арабиясы болса, вакциналанған шетелдіктерді бүгіннен бастап кіші қажылыққа қабылдауға кіріседі. Осылайша, бұл корольдік 18 айдан бері қайтадан өз аумағына өзге мемлекеттердің парыз өтеуші азаматтарын кіргізіп отыр.
Бұған дейін «умра» қажылығына айына 60 мың мұсылман жиналса, енді олардың санын бірте-бірте 2 миллионға дейін көбейту көзделіп отыр.
Ал, Үндістанда коронавирусқа қарсы екпе салдырғандар 500 миллионға жетті. Мұны ел премьер-министрі Нарендра Моди мәлімдеді. Бұл мемлекетте барлық ересектерді тегін вакциналау науқаны маусымның 24-де басталды. Үндістан - пандемиядан аса қатты зардап шеккен елдердің бірі. Бұнда ковидті 32 миллионға жуық адам жұқтырып, 427 мыңдайы қайтыс болды.
АҚШ-та мұғалімдерден вакцина паспортын талап ету мәселесі көтеріліп отыр. «Америка ұстаздары федерациясының» президенті Рэнди Вэйнгартеннің мәлімдеуінше, оқытушыларды иммундау тым жас балаларды вирус қаупінен қорғау үшін қажет.
Құрама Штаттарда қазір коронавируспен госпитальге түскен жеткіншектер көбейіп келеді. Бұған осы инфекцияның «дельта» вариантының кең тарауы себепші.
Арыстан Рысбек
