Жаңалықтарды Telegram арнамыздан оқыңыз!Хусто Хорхе Падрон – шығармалары әлемнiң отыздан аса тiлiне аударылған, көптеген халықаралық әдеби сыйлықтарды иеленген испан ақыны.
Туындыларына жалпы адамзат баласының тағдырын, бүгiнде әлем жұртшылығын алаңдатып отырған мәселелердi өзек етiп алған ақын шығармалары Еуропа мен Америкаға кеңiнен мәлiм.
Хусто Хорхе Падрон - 1943 жылы Испанияның Лас-Пальмас провинциясында дүниеге келген. Барселона, Париж, Стокгольм, Осло қалаларында білім алған. Алғашқыда адвокат мамандығын игерген азаматтың кейіннен бар қызығушылығы әдебиетке арналады.
Падрон – халықаралық «Экиваленсиас» журналының негізін қалаушы және бас редакторы, Испания ПЕН-клубының бас хатшысы, Малларма Париж академиясының, Неаполит академиясының, испан тілі Солтүстікамерикалық академияның корреспондент-мүшесі, Дүниежүзілік Мәдениет және өнер академиясының құрметті мүшесі.
Испан тілі Король академиясының «Фастенрат» сыйлығымен, Швед академиясының жүлдесімен және Боснан жүлдесімен марапатталған.
Испан ақынының өмірі мен шығармашылығы турасында толығырақ бүгін сағат 13:45-те «Қазақстан» Ұлттық телеарнасындағы «Поэзия әлемі» хабарынан біле аласыздар.
Қайда, қайда барамыз?
Естеліктердің, жадымызда сақтаудың түкке тұрмайтынын түсіндік. Себебі бізді қоршаған барлық әлем өз мағынасын, өз болмысын сақтап қала алмайды екен.
Себебі өмір бізді сыртқа лақтырып тастайды. Өмірдің өзі бізді өлтіреді. Ұзақ уақыт кеудені сыздатқан жан жарасы – махабаттың ғұмырының қаншалықты қысқа екенін үйретеді.
Сұлулықтың жап-жарық нәзік дірілі мен аңғал армандар ғана әлемді біріктіріп тұра алады. Біз бүкіл әлемнің жел мұңайып желпіген қиыршық құмға айналатынын көрдік.
Біз – қорғауға да, жұбатуға да дәрменсіз үнсіздіктің – жалғыздық екенін түсіндік. Өлеңдегі үлкен сөздердің бізге баспана бола алмайтынын олар келмей жатып-ақ түсіндік.
Біз оның – көздерде аласұрған жан айқайы ғана екенін түсіндік. Қоштасудың да мағынасы қалмады. Енді қайда барамыз? Айтшы, қайда?
Аударған: Танакөз Толқынқызы
