Сарыағаштықтар жүзім жинаудан рекорд жасады

Сарыағаш ауданында өткен «Алтын күз- 2015» мерекесінде бірқатар еңбек майталмандары марапатталған болатын. Онда Қапланбек ауыл округінен «Бахадур» шаруа қожалығының иесі Б.Рашидходжаевтың еңбегі ерекше аталды. Шаруа өзінің 1,5 гектар жүзім алқабынан 55 тонна өнім алған. Бұл туралы Оңтүстік Қазақстан облысы әкімдігі баспасөз қызметінің facebook парақшасында жарияланды.

1998 жылы құрылған шаруа қожалықтың небәрі 4 гектар ғана жері бар. Жүзімнен қалған жеріне көшет, көкөніс өндіріп сатады.

Қапланбек –«Қапланбек» маркалы шарабымен кешегі Кеңес одағына әйгілі болған ауыл. Былтыр бұл ауылдың жүзім өндірушілері 234 гектардан 2890 тонна өнім алса, биыл бұл көрсеткіш екі есеге артып, 5148 тоннаны құрап отыр.

Kaznews.kaztrk.kz