Оралда демалыс күндері ауыл шаруашылығы өнімдерінің жәрмеңкесі өтті

Іс-шара қала тұрғындарын қолжетімді азық-түлікпен қамтамасыз етіп қана қоймай, жергілікті тауар өндірушілерді қолдау мақсатында ұйымдастырылды. Жәрмеңкеге Теректі, Бәйтерек, Ақжайық аудандары мен қаладан 41 кәсіпкер және жеке қосалқы шаруашылық иелері қатысты.

Сауда сөрелерінде 9 тонна көкөніс пен бау-бақша дақылдары, сондай-ақ жеміс-жидек, бал, сүт өнімдері, жұмыртқа, күнбағыс майы, шұжық және нан-тоқаш өнімдері ұсынылды. Бағасы да қолжетімді. Тұрғындар егістен тікелей жеткізілген мол өнімге риза болды.

«Жәрмеңке тамаша. Ауа райы да керемет. Тауарлардың сапасы да, сатушылар да жақсы. Бағасы көңілге қонымды. Перец алдым 400 теңгеден, жаңа жиналған. Қияр 450–500 теңге. Жақсы, жаңа піскен».

Ерік Ибраев, тұрғын:

«Картоп алдым 140 теңгеден, пияз 120 теңгеден. Жарайды ғой. Базарда енді көтермелеп алмасаң, қымбаттау. Мұнда арзандау. Жақсы, дұрыс ұйымдастырылған. Халыққа жеңілдік болады. Үйдің қасында болған соң, келіп ала қоямыз».