Жаңалықтарды Telegram арнамыздан оқыңыз!Шетелдердегі референдум учаскелерінде де дауыс беру қызып жатыр. Елшіліктер мен консулдықтар ғимараттарындағы учаскелерге түрлі себеппен шетелде жүрген азаматтар таң атқалы тоқтаусыз келуде.
Айдос Әшімұлы Тілші:
Мен тұрған Ыстамбұл қаласындағы №255 референдум учаскесінде таңғы жетіден бері дауыс берушілер легі тоқтаусыз келіп жатыр. Конституциялық құқығын пайдаланып, таңдау жасап жатқандардың басым бөлігі осында оқитын студенттер мен демалуға келген азаматтар. Студенттер арасында өмірлерінде бірінші рет дауыс беріп тұрғандар да бар. Солардың бірі Нұрислам Мұптадахин өзі үшін де ел үшін де ерекше күнде дауыс беруге келгеніне қуанышты.
Нұрислам Мұптадахин, Ыстамбұл сауда университетінің студенті:
Бірінші рет келіп тұрмын дауыс беруге. Қазір жаңа Қазақстан, жаңа өзгерулер болып жатыр сондықтан мен де өз даусымды беруге келдім осы жолы. Жалпы Қазақстан жастардың қолында сондықтан үлкен өзгерістер болады деген ойдамын.
Халықтың көпшілігі маңызды саяси шараға отбасыларымен, кішкентай балаларын да ертіп келіп жатыр. Осы учаскеге тіркелген 300-ге жуық дауыс берушінің қазірге дейін жартысына жуығы дауыс беріп болды. Дегенмен дауыс беру учаскесінің жабылуына әлі бес сағаттай бар. Сондықтан кешке дейін тізімдегі азаматтардың барлығы да өз таңдауларын жасайды деп ойлаймын.
