Семейде әкімшілік ғимараты жөнделе бастады

Семейде жаппай тәртіпсіздік жасап, әкімшілік ғимаратын қиратқандар қолға түскен. Тергеу жүргізіліп жатыр. Ал стратегиялық нысан қалпына келтіріле бастады.

Ержан Жақып, тілші:
Семейде бүгін жаппай тәртіпсіздік кезінде қиратылған әкімшілік ғимараты жөнделе бастады. Бұзақылар бірінші қабатынан бастап бесінші қабатқа дейін бүлдірген. Барлық бөлмелерді аралап, тонаған. Сейфтерді бұзып, ішіндегі құжаттарды шашқан. Жиһазды қиратып, компьютерлердің қатқыл дисктерін шешіп алған. Бейнебақылау камераларын түгелдей істен шығарған. Заңсыздық жасағандардың дені ұсталған. Бірқатары іздестірліп жатыр. Тергеу жүргізілуде. Орталық алаңдағы полицияның өртелген көліктерінің қаңқалары алынып, ол аумақ жинастырылған.

Айдар Садырбаев, Семей қаласы әкімінің орынбасары:
Қазіргі таңда әкімдік ғимаратына келтірілген шығындар бойынша, тиісті есептеу жұмыстары атқарылуда. Қызметкерлер мен вологнтерлардың күшіменен әкімдік ғимартының ішін тазарту, қалпына келтіру жұмыстары жүргізіліп жатыр. Жалпы қалада қоғамдық-саяси ахуал тұрақты.