Жаңалықтарды Telegram арнамыздан оқыңыз!2015 жылдың 23-24 сәуірінде Алматыда VII «Мәдениеттер тоғысындағы тіл, әдебиет, аударма және журналистика мәселелері» атты халықаралық ғылыми-практикалық конференция өтеді.
Шара Сүлейман Демирел университеті, ҚР Президенті жанындағы Мемлекеттік басқару академиясы, әл-Фараби атындағы Қазақ Ұлттық университеті, КИМЭП университеті және Ататүрік-Алатоо Халықаралық университетінің (Қырғыз Республикасы) ұйымдастыруымен өткізілмек.
Дәстүрлі түрде өткізілетін бұл конференцияның басты мақсаты – түрлі мәдениеттердің ортақ құндылықтары мен ұлттық ерекшеліктеріне бағытталған шетелдік және отандық ғалымдардың ғылыми-зерттеу ізденіс жұмыстарымен танысу және талқылауға ғылыми орта қалыптастыру.
Конференция жұмысының бағыттары:
- Лингвомәдени концептология және ұрпақтың мәдени сабақтастығы;
- Тіл біліміндегі жаңа үрдістер мен дәстүрлі бағыттар;
- Мәдениеттер тоғысындағы әдебиеттану ғылымы: өткені, бүгіні, келешегі;
- Мәдениаралық коммуникация аспектісіндегі қазіргі аударматану: теория, тәжірибе, оқытудағы жаңа үрдістер;
- Тілді мәдениаралық қарым-қатынас аясында оқыту: өзіндік ерекшелігі мен келешегі;
- Мәдениеттер тоғысындағы түркітану ғылымы: жетістіктері, жаңа көзқарастар;
- Қазіргі орыс тілін зерттеудегі өзекті мәселелер;
- Коммуникация және медиа: қақтығыс пен бейбітшілік;
- Қазақстанның этносаралық толеранттық және қоғамдық келісім моделі: маңызы, тарихы, құндылықтары;
- Мәдениеттер тоғысындағы көптілді білім беру жүйесінің әдіснамалық негіздері;
- Білім берудегі инновациялық технологияларды қолдану;
- Бизнес және экономикалық зерттеулерде мәдениет мәселелері;
- Посткеңестік Орталық Азияның өзекті мәселелері.
Сонымен қатар, шара барысында «Өзге және шет тілді аудиторияда тілдерді оқыту: мәселелер мен келешегі», «Тілдік тұлға және этникалық ренессанс» тақырыптары аясында дөңгелек үстел ұйымдастырылады.
