Рақымшылық заңы бойынша 30 мыңға жуық жазасын өтеп жатқандарға түрлі жеңілдіктер берілмек

Елді елең еткізген аптаның тағы бір жаңалығы – Қазақстан Республикасы Тәуелсіздігінің 25 жылдығына орай жасалуы мүмкін Рақымшылық туралы заң жобасының Мәжілісте талқылануы. Бұл жоба бойынша, 1 800 адам бостандыққа шықпақ, 30 мыңға жуық жазасын өтеп жатқандарға түрлі жеңілдіктер берілмек.

Қоғам бұл жаңалықты жақсы қабылдады. Дегенмен, қылмыстың қандай түрін жасаған адамдарға рақымшылық болуы мүмкін деген сауал күні кешеге дейін ашық тұрды.

Апта соңында Мәжіліс қабырғасында болған талқылаудан соң Бас прокурордың бірінші орынбасары Иоган Меркель біраз сауалдарға жауап беруге тырысты. Ол заң жобасының жаңадан талқылана бастағанын, нақты жауапты кейінірек алатынымызды ескертті.