Жаңалықтарды Telegram арнамыздан оқыңыз!«Қазақстан халқы Ассамблеясы – біздің көпұлтты халқымыздың бірлігін сақтайтын мәңгілік қорғанына айналды. Ол бірлік, тұрақтылық, толеранттық, жалпыға ортақ еңбек, патриотизм сияқты ортақ құндылықтарымызды қазақстандықтардың санасына сіңіруде...».
Бұл Елбасының Қазақстан халқы Ассамблеясының жылына орай жолдаған құттықтау хатынан үзінді. Оны дәл кеше Астанада өткен «Менің Қазақстаным!» атты форумда Ассамблея төрағасының бірінші орынбасары Ералы Тоғжанов қатысушыларға оқып берді. Осы шара кезінде Ассамблея мүшелері Елбасыдан Президенттік сайлауға қатысуын сұрап, әрі халыққа Үндеуін жариялады.
1995 жылы 1 наурызда Президент Қазақстан халқы Ассамблеясын құру туралы Жарлыққа қол қойды. Бұл мерейлі күн Тәуелсіз елдің тарихында жаңа белестің бастауы болды. Сондықтан, тамыры терең татулық пен толеранттылықтың Қазақстандық үлгісі болған Ассамблея жылына орай Мемлекет басшысы құттықтау хатын жолдады.
Ералы Тоғжанов, Қазақстан халқы Ассамблеясы Төрағасының бірінші орынбасары:
Қазақстан халқы Ассамблеясы - бейбітшілік пен келісімнің, қасиетті Отанымызда өмір сүріп жатқан барлық ұлттар мен этностар достығының ең басты және берік іргетасы.
Ол – елдігіміздің қалыптасуы, Тәуелсіздігіміздің нығаюы тарихында Қазақстан Республикасының халқы. Терең экономикалық реформалар жүргізуде және қоғамымыздың әлеуметтік әрі саяси негізі ауқымын жаңғыртуда айрықша рөл атқарды.
Мәңгілік достық пен сыйластық, өнегелі өнерде шекара жоқ. Бұған дәлел Ассамблеяның «Бейбітшілік пен келісім жол картасы» атты мега-жобасы. Әр аймақтан ат арытып, Астанаға жиналған делегаттар тұрақтылық идеясын ту еткен шара аясында атқарылған істерді қорытындылады.
Идрис Юнусов, «Вынхуа» дүнген мәдени орталығының өкілі:
Әр үміткердің қазақтың әнін айтқанына қуаныштымын. Неге десеңіз, әр этнос міне Қазақстанда, бір шаңырақ астында тұрып жатырмыз.
Форумда «Қамқор» жастар жобасы мен «Тарих тағылымы» қазақстандық кино күндерінің басталғаны да жарияланды. Бұдан бөлек, «Атадан мал қалғанша, тал қалсын» деген қағиданы ұстанған бүгінгі буын еліміздің барлық өңірінде ағаш егіп, жұртшылықты Қазақстанды жасыл желекке айналдыруға шақырды.
Расул Ахметов, республикалық «Жарасым» жастар бірлестігінің атқарушы хатшысы:
Біздің ардагерлерімізге әлеуметтік көмек көрсету жағынан акциялар өткізілетін болады. Бұл ең алдымен, жастарды патриоттық рухта тәрбиелеуге бағытталған шара.
Сонымен қатар, «Менің Қазақстаным!» республикалық музыкалық фестивалінің жеңімпаздары да қазақ халқының әнін шырқап, күйін күмбірлетті. Өнерлерін ортаға салып, көпшілікті тәнті етті.
Константин Луца, «Менің Қазақстаным!» атты республикалық фестивальдің жеңімпазы:
Туған жеріміз - Қазақстанымыз асқақтай берсін, бәріңізге бақыт тілеймін.
Ал, шараның шарықтау шегі қатысушылардың Президентке Ассамблеяның сайлау өткізу туралы бастамасын қолдағаны үшін алғыс айтуымен аяқталды. Соңынан, Ассамблея мүшелері Нұрсұлтан Назарбаевтан 26 сәуірде өтетін Президенттік сайлауға қатысуын сұрады. Үндеу жариялады.
Тамара Ширмер, «Оберег» украин этномәдени бірлестігінің төрайымы:
Құрметті Нұрсұлтан Әбішұлы! Бұл қадам Ассамблеяның кезектен тыс президент сайлауын өткізу туралы жалпыхалықтық бастамасынан туындайды. Сіздің ел алдындағы абыройыңыз биік.
Еліміздің азаматтары Сізге сенім артады. Сіз ең күрделі кезеңдерде елді басқарудың айрықша тәжірибесінің иесісіз, Сіздің басшылығыңызбен Қазақстан қаншама сынақтардан қайыспай өтті. Сондықтан, біз Сізден Президент сайлауына қатысуыңызды сұраймыз.
Осы үндеуге орай форум қатысушылары баспасөз мәслихатын да өткізді. Шын мәнінде, халық еліміздің теңдессіз экономикалық жетістіктері мен әлеуметтік табыстарын, тұрақтылық пен ертеңгі күнге деген сенімін Ұлт көшбасшысымен ұштастырады, - дейді делегаттар.
Розақұл Халмурадов, ҚР Парламенті Мәжілісінің депутаты, ҚХА мүшесі:
Қай кезде елде тыныштық болса, бейбітшілік болса, халықтың бірлігі болса. Қазақ халқы бір өте дана халық. «Бір күн жанжал болған үйден қырық күн береке кетеді», деп босқа айтқан емес.
Берекесі кетіп жатқан көрші елдерді көріп жатырмыз. Сол себептен де бүгінгі қабылданған Үндеу бүкіл халықтың қолдауына ие болады. Ал, сол халықтың өтінішін, үндеуін Елбасы да шетте қалдырмайды.
Бекзат Алтынбеков, Жезқазған қаласындағы қоғамдық келісім кеңесінің төрағасы:
Бұл Үндеу біздің үлкен өтінішіміз ретінде жолданды. Сондықтан, Елбасымыз Нұрсұлтан Әбішұлы Назарбаев бұған үлкен салиқалылықпен қабыл алып, кемеңгерліктің тағы да бір үлгісін көрсетіп, осы халықтың тілегіне оң жауап береді, Президент сайлауына түседі деген үмітім зор.
Жалпы, Ассамблея қолға алған ауқымды істер мұнымен шектелмейді. 1 наурыздан бастап, олар республика бойынша 2486 елді мекенде 4 мыңнан астам шара өткізбекші.
Алмат ӘБДІРАМАН
