Өмірзақ Шөкеев Елбасыға жекешелендіруге дайындық барысын баяндады - «Qazaqstan» Ұлттық телеарнасы

Өмірзақ Шөкеев Елбасыға жекешелендіруге дайындық барысын баяндады

28.04.2014

Мемлекет басшысы Нұрсұлтан Назарбаев осы аптада Еуразиялық экономикалық комиссия алқасының төрағасы Виктор Христенконы қабылдады. Кездесуде енді бірер күннен соң Минскіде өтетін Жоғары Еуразиялық экономикалық кеңестің күн тәртібі қаралды.
  
 Мемлекет басшысы Нұрсұлтан Назарбаев ол кездесудің маңызы мен интеграциялық процестердің пайдасына көңіл аударды. Виктор Христенко болса Еуразиялық экономикалық одақ жөніндегі шартты әзірлеу барысы туралы баяндады.
  
 Сондай-ақ, Президент Нұрсұлтан Назарбаев Еуразиялық даму банкі басқармасының төрағасы Игорь Финогеновпен кездесті. Екеуара әңгімеде банктің еліміздегі жұмысының негізгі бағыттары талқыланды.
  
 Банк 2006 жылдан бері жұмыс істеп келеді. Өткен жылдарда қаржылық құрылым Қазақстан экономикасына 2 миллиард доллардан аса қаржы құйған, сондай-ақ, электр энергетикасы, машина жасау, химия өнеркәсібі секілді салаларда 28 жоба іске асқан.
  
 Мемлекет басшысы «Самұрық-Қазына» Ұлттық әл-ауқат қоры басқармасының төрағасы Өмірзақ Шөкеевті қабылдады. Қор төрағасы трансформациялау бағдарламасын әзірлеу процесі мен жекешелендірудің жаңа кезеңіне дайындық мәселелерін баяндады. Қорытындысында Мемлекет басшысы бірқатар нақты тапсырмалар берді.

Хабарламаларға жазылу