Жаңалықтарды Telegram арнамыздан оқыңыз!Ұлы Жібек жолы бойында орналасқан елдер арасындағы кедендік тосқауыл азайып, сауда-саттықтың дамуына мүмкіндік жасалады.
Ол үшін Қазақстан, Қырғыз, Түркия және Әзіржайжан елдерінде ортақ ақпараттық жүйе құрылуы керек.
Шымкентте бас қосқан Түркітілдес мемлекеттердің Кеден қызметі басшылары осындай бастама көтерді.
Жиынның біздің елде өтуінің де өзіндік сыры бар.
Өйткені, Қазақстан Еуропа мен Азияны байланыстыратын негізгі транзиттік дәліз саналады.
Оның үстіне, біздің сыртқы экономикалық саясатымыз халықаралық интеграцияларды және жаһандық экономикалық процестердің шекараларын кеңейтуге бағытталған.
Сондықтан, Түркі кеңесіне мүше мемлекеттерге Қазақстан Кедендік одаққа мүше елдер нарығына жол ашады.
«Бастысы, көлік пен кеден мәселесі тиімді жұмыс істегенде ғана көрші елдер арасындағы экономикалық қарым-қатынас нығаяды», дейді жиынға қатысушылар.
Сондай-ақ, келелі кеңесте «Керуен сарай» жобасының жүзеге асу барысы, бақылау бекеттеріндегі арнайы техникаларды дамыту мен оларды меңгеру үшін арнайы семинарлар ұйымдастыру мәселелері сөз болды.
Абзал Сапарбекұлы, Түркі кеңесі бас хатшысының орынбасары:
Тексеруді оңтайландыру керек. Әрбір бекетте бір сағат тұратын болса, тауардың өзінің шығыны 4 күнге өседі екен. Біздің де негізгі мақсатымыз - әрбір тауардың неғұрлым бақылаудан аз өтіп, соңғы нүктеге тезірек жетуі.
Айнұр АҚБАЕВА
