Құрылым бес әлеуметтік бастаманың сапалы жүзеге асуын қадағалайды. Кеңес мүшелері қолға алынатын жұмыстардың парқы мен нарқын бағамдады. Ал келер жылы аймақта 3 ірі газ таратушы станцияның құрылысы қарқын алмақ. Кенді өлке бойынша 800 шақырымнан астам газқұбыры салынады деп жоспарланып отыр.
Нәтижесінде өндірісті өңірдің 6 қаласы мен 120 елді мекен көгілдір отынмен қамтамасыз етіледі. Жобаның қарағандылықтар үшін де маңызы зор. Мәселен, экологияның жақсаруына септігін тигізеді.
Сонымен қатар, әлеуметтік бастама шеңберінде аймақта 4 жаңа жатақхана бой көтереді. Жалпы, Қарағанды облысындағы 85 мыңға жуық студенттің 3 мыңнан астамы жатақханаға мұқтаж.
Бекзат Алтынбеков, облыстық мәслихаттың депутаты:
- Бес әлеуметтік бастаманы жүзеге асыру үшін мемлекеттен бюджет бөлініп жатыр. Оның сапалы, жүйелі әрі дұрыс жұмыс жасауы үшін жан-жақты бақылауда болуы керек деп есептейміз. Қоғамдық кеңестің мүшесі ретінде біз мойнымызға жаңа міндеттер алып отырмыз. Кеңес алдағы уақытта өзінің жұмысын жақсы деңгейде көрсетеді деп ойлаймын.
Руслан НҰРЛАНҰЛЫ